Fraili

Nu desisti conhusión denguna: un tapau es argu que está tapiau, polque tapal es «ponel entremeyu dargu un estáculu que empia vel al otru lau». Tápia i tapal tinin la mesma raís d’orihin onomatupéyicu tap. En purtugués el verbu «tapar» arrecohi el sentiu de «celcal» «vallal», cosa que nu hazi el DRAE; más en purtugués la parabra «tapada» senifica «celca». Asinque dambas las dos enholmacionis que tinis son correutas, Evo.

Amigu Saavedra, nu hagas tantas alabáncias, que s’avehina unu. Güenu, ave que vos espriqui asín poncima cúmu va lo de la z/c,ç, la h i la s.

La z 

La «z» se gasta pol son entredental fricativu sonoru [ð], en cristianu, una «d» con un son mas rehilón que en «adiós»: es la «d» que prenunciamus en «zagal», «barzón» u «hazel», peru que pol etimulohia creu comenienti escrebila cumu se escrebia en epoca meyeval: con z.

La letras «c/ç» 

Las gastamus pal son entredental fricativu sordu [θ], paque mos entendamus, el son de las parabras «cabeça», «acienti», «cien». La ç se prenúncia lo mesmitu que la «c», peru escrebimus «ç» alantri de a, o i u i «c» alantri de e, i. Es lo mesmu qu’en castellanu cuandu escrebin z alantri de a, o, u i c alantri de e, i. Cuandu el castellanu escrebi zapato, muhotrus escrebimus çapatu. Gastamus la «ç» lo mesmitu que se hazia antañu, polque endigual qu’en purtugués u francés, conselvamus la opusición sonora/sorda meyeval, cosa que nu á conselvau el asturianu u el castellanu. Puestu qu’asina prenunciamus i asina destinguimus, creu que la holma simpri d’escrebil estus sonis es cumu lo hazian antañu. Nu estanti, nu vos conhundais, la ç suena cumu la «c» i nu cumu «s». En purtugués escrebin «calçar» i prenúncian [kalsár]. Muhotrus escrebimus «carçal» i prenunciamus [karθál].

La h

La «h» en estremeñu tini el son larínhiu fricativu sordu u sonoru (sigún la pusición) de [h], nu tini ná que vel cola «j» castellana cumu vuhotrus sabís mu bien. Enas luengas que gastan esti tipu d’aspiración cumu en ingrés, latín, ec. sempri án escrebiu una «h». Polo heneral, ondi los asturianus escrebin «x», muhotrus escrebimus «h», pos asina á siu la volución: xulgar > hulgal, abaxu > abahu.  Cumu la «h» es la letra que fonética i ortugraficaenti es la mas correuta, creu comenienti siguil esi patrón i nu dil de rabeón atrás del castellanu i siguil la su ortugrafia que en ná mos val.

Eno tocanti a la «s» sonora [z] que vuhotrus conselvais, estoi cavildandu sobri muifical esi espetu ena ortugrafia qu’escrebí i hazel lo mesmu que con la c/ç i z i que escribamus tamién esus sonis cumu antañu, es izil, con s/ss: -s- entrevocálica cuandu prenunciemus [z] cumu en casa u helmosu i ponel –ss- cuandu prenunciamus [s] cumu en massa, dessamin u passal. Aquí tamién siguiriamus la ortugrafia purtuguesa u francesa, que es la meyeval. Esa es la mi prepuesta, i al mi hulgaeru, creu que es la mas comenienti i simpri. Agora quea que vuhotrus los palrantis opineis.

Un salú. 

Anque sedria aventurau izilu, se trata dun ehempru de declinación en estremeñu. Abemus en estremeñu, pa los nombris en -u en -i un casu e vocativu, cumu notras tantas luengas, enos que cuandu mos derihimus a arguin se gasta una holma en -o u en -i al respetivi. Izimus: Gório, ahila palantri qu’ara voi yo. Nesa oración Gório está en vocativu, con vocal acabera abierta. Peru alugu izimus El Góriu á ahilau palantri. Aí gastamus en -u polque nu se llama a Góriu, el Góriu es suhetu. Estu tamién aconteci ena «fala». La razón es fonética, polque cuandu gastamus un nombri en hunción vocativa es cumu si ihieramus una entreheción, pol esu izimus «Benardo, ven pacá, coile» i nu izimus «*Benardu, ven pacá, coili«. I cuandu saluamus izimus «amos» u «amos allá» i nu «amus«. Tantu con entrehecionis de pol sí cumu con nombris (seyan de presona u nu, sustantivus i ahetivus) nu afechamus la vocal final.

Eno tocanti al artículu, se emprea el artículu con nombri própiu, seya de muhel u d’ombri cuandu se conoci el referenti, polo menus esa es la costumbri enos muestrus puebrus. Izimus «El Huli i la Rosina estuvun ayeltardi en casa«, nu «Huli i Rosina estuvun en casa«. Evo, tendrias que acraralmi una mihina mas esi usiu nel vuestru puebru al tentu el nombri los ombris. Un salú. 

Peninerri

Procei de la raís latina pin- «pinu», pola holma e piringutu. A esta raís se l’á añiiu dos sufihus. El primeru es el sufihu -inu: penin-  (cf. cántabru peninu «pinitu»). El segunderu es –err, de caraiti deminutivu u despeutivu. Asinque pen-in-err-i «piringutu paí chiqueninu».

Merrea

Se trata dun casu de conhusión de labialis, de b pol m. La holma premitiva sedria berrea, pola onomatupeya bee (cf. verbu berreal). Lo que nu me quea craru es si lo gastais cumu sustantivu u cumu ahetivu.

Eno tocanti a «choina», pol favol, Balbanchu, imi si lo prenunciais choi-na u cho-i-na, polque m’ayuaria a landeal la su etimulohia. Un salú.

Dambas parabras rescrecin del latín pellem «piel, pellehu», mas el sufihu -otu/-oti/-eti. La holma mas antígua es la que vuhotrus gastais en –eti: empeleti, peleti, pus conselva la –e– < -i- latina de la holma pellitum, la cuala, curiosiaenti senificaba en latín «el que está arrevuhau en piel». Las hormas empelotu/i i pelotu/i son criacionis posterioris pol mé el sufihu -otu/-i, mas frecuentis ena luenga qu’el acaberu en -eti.

El su usiu está bastanti craru, anque nu mos paremus a cavildalu bien: la horma empeleti es un alvérbiu, proceenti la holma en peleti.

Daivus cuenta de que cuandu palramus de empeleti, nu gastamus la holma en prural: Está empeleti/Están empeleti. Estu es una crara seña de que se trata dun alvérbiu. A la escontra, las holmas peleti/peloti/pelotu son ahetivalis, equivalenti a «esnú». La custión de pol qué gastamus mas empeleti que peleti es pol usiu el verbu: deque izimus «estal» se marca un estau i esi estau lo aseñalamus cola prepusición «en»: estoi empeleti. Peru si gastamus otru verbu, cumu «vel», sigún el contestu, puemus oyel los vidi pelotinus u los vidi empeloti.