El estremeñu, idioma atarugá

Salús a tolos forerus. Endispués de vel que hazís usiu el estremeñu nesta páhina i que contribuis ena compusición dun vocabuláriu garrovillanu, quiu hazelvus chegal esti manifiestu qu’anduvi repartiendu pol Caçris capital estas semanas atrás. Quiu enhormalvus de que a poquinu a poquinu imus arrecuperandu la muestra palra, pol mé de sítius cumu esta web u pol mé dotrus labutus. Me gustaria dalvus enteracionis el labutu que vinimus hiziendu pol mé d’Intelné pa homental de la muestra parti el estremeñu:

-Andamus labutandu pola redi ena criación duna Wikipedia en estremeñu: la Güiquipeya http://incubator.wikimedia.org/wiki/Wp/ext Entavia farta una mihina paque mos la aprebin. Si arcançamus esu, tendremus la posibiliá de crial un emportanti centru e devurgación el estremeñu.

-Angunus colegas andan labutandu ena traución e pogramas enhormáticus, sotítulus de vídius i piniclas , .

-Yo pola mi parti andu envestigandu el estremeñu cumu filulogu. Tengu escrebia la primel ortugrafia pal estremeñu i un librinu puesias escrebiu totalmenti en estremeñu. Angañu andu labutandu ena gramática qu’el estremeñu s’esmereci. Podís vel muchas destas cosinas en .

Pa to estas cosas estamus cuatru pelagatus i sabemus que desisti albonda henti paí entresá en deprendel u colabutal en pro la muestra palra, peru lo malu es que andamus tós desapartaus i ca cual a lo suyu. La custión es que mos vaigamus ahuntandu i olganizandu pa hazel bien las cosas, polque homental el usiu duna luenga nu es cosa de tan poquina henti. Vos piu que si de verdá estais concenciaus de gastal una palra própia i sabís que es nesezáriu movelsi paque nu muera, nu vos queeis hincaus viendu cúmu mos guarrean la muestra palraera i mos hollan i abangan embahu un yugu foriatu. Peru mehol vos ehu que guipeis el manifiestu dembahu i cavileis hondaenti si estais apreparaus pa dali un huturu al estremeñu u pa himplali unta el hochi de que se muera. Velequí el manifiestu:

«El estremeñu es el astulionés d’Estremaura, endigual qu’el asturianu lo es d’Astúrias. Sin embalgu, sempri á bistu ciertus regañus nel su afilmaeru. A la escontra, naidi á tiniu pobremas en izil qu’el estremeñu es castellano mal hablado cuandu quirian izil estremeñu mal palrau. En efeutu, ain quien palran estremeñu, quien palran castellanu estremeñizau i, hueraparti, los que hazin el redículu precurandu palral castellanu almientándulu cumu estremeñu. Asinque, las hazionis emperialistas el palraeru castellanu án condenau, nu sin razón, el mal palraeru que desisti en Estremaura el castellanu. Peru, dendi drentu d’Estremaura, otra parti —menus hazión i menus emperialista, ofiaenti—, con un atestigaeru seculal i un usiu inenterrumpiu de patrás, adenúncia el mal palraeru que desisti de meyaus el sigru pasau hata angañu el estremeñu. Los primerus, los emperialistas, acusan a los estremeñus del usiu sistemáticu e vocalis afechás postónicas i d’aspiral consonantis peru nu del gastaeru el enfenitivu presonal, del posesivu tónicu, d’apreciativus de graación en alvérbius i conhuncionis u de tenel, cumu los antígus latinus, parabras cumu megu, tegu, segu, vidi, didi, imus u abemus. Los segunderus, los estremeñufalantis, vreaus pun continu guarreu foriatu qu’á abangau la su memória i el resuelgu con que la prenunciaban,  anésicus tós, án orviau que palraban estremeñu. Angunus Funes qu’enhamás orvian pol muchu que la rialiá chambi i s’eschanguin los usius, arreconcunaus pol braçus estremeñus, án alevantau la cabeça i án gañitau: «Hata aquina amus chegau!». Endispués de bel comparau el cántabru i el asturianu dangañu con el estremeñu atopandu milenta d’afiniais, dispués d’albondus estuyus lingüísticus, dispués la reconocéncia la desisténcia el estremeñu pola comuniá entrinacional, dispués de mas dun sigru literatura nesta palra, aluspués de belsi escrebiu la primel ortugrafia nolmativa, endispuesinu e toas esas cosas, ain quien, porfionis, entavia niegan la desisténcia estremeñu. Hollándulu i esvreándulu con odiosas i ensustancialis comparáncias, los emperialistas afilmarán anti lo ófiu, nu que estu es castellanu (!), argu que s’aprécia ena primel visual, sinu qu’es un enventu, una fabulación. Una luenga palrá en Estremaura dendi l’Arreconquista pol millaris de presonas risurta sel una envención i, craro, pol esu es mestel atarugala pol mé el avehinaeru i el corrihieru. Qué ergumentu mas probi! Esa á siu l’ación el pensaeru foriatu sobri la muestra luenga, ara ya mas menuspreciá pol puebru que nunca. Namás mos quea cuental cola henti nueva, colos estremeñus el mañana, paque nu premitan el acelerau espenaeru dun palraeru antigüísimu. Que nu seyan inorantis de luenga ni s’ehin hollal. Ena vuestra manu, ena e los falantis, está el puel dinifical el estremeñu pa esti resulhil. Abemus pocu tiempu: los relocis aguran las sus auhas pal ingrés i pal español i el orihoscu abati se mos á encahau.»