Inicio » Generales » La Laguna » Análisis etimológico.

Cudiau colos localismus

Garrovillas de Alconétar Foros Generales La Laguna Análisis etimológico. Cudiau colos localismus

#104293
Fraili
Participante

Dotoljoskin, palral de localismus en Estremaura es argu que namás hazin los dialeutulogus que labutan pol farrungal el patrimoñu lésicu estremeñu. Pocas parabras conoçu que namás s'igan nun puebru dau. Que chambin los referentis u se mui el prenunciaeru nu senifica sel parabras destintas. Pol mu ralu que vos sueni lo de peninerri sempri enhalla parabras apaicias en estremeñu que gastin esa mesma raís cumu "pinoti", "pinu", "pininu". Lo de "ababuei" pos cruzi entri babuesa i güei, dambas las dos desistentis tamién en estremeñu. Pol esu palral de localismus es argu que nu me gusta, polque si ai argu que é descubiertu nestus añus d'envestigaeru á siu que el lésicu estremeñu de norti a sul es el mesmu, con mayol u menol grau de castellanización, peru el mesmu.

Eno tocanti a lo de "cúyu pan deharras?" el empreu del pronombri "cúyu" con valol enterrogativu nu vos acagaci, polque asina era en latín i asín era en castellanu i astulionés antíguus. Muhotrus lo conselvamus cumu tantas otras parabras i hechus gramaticalis. Ponti el ehempru el usiu del posesivu entri artículu i posesión "el mi cochezinu", esu era lo nolmal en castellanu antíguu, peru en estremeñu, lo mesmu qu'en asturianu, purtugués, gallegu, italianu, ec asina se á conselvau. Dendi la pespetiva emperialista te izirán que se trata dun vurgarismu i un arcaismu, dondi ellus án volucionau con otra holma sintática. La rialiá es que son muchas las luengas romancis cola estrutura artículu + posesivu + nombri i nu pol ellu son rahus arcaicus i vurgaris. Eno tocanti al sintiu la frasi, está craru que el que trai el pan a casa son los padris, pol esu preguntal de qué pan comis es lo mesmu preguntal de qué família eris, quiénes son tus padris. Más, cumu esa custión me risurta tan pulia, sintética i metafórica la lihí pa la mi bitácura, que asina se llama: cúyu pan eharras? http://cuyupaneharras.blogspot.com/

Un salú.