Hundeai con el ñugu!!!

Yeu! Nel mundu ondi vivimus abemus la mala suerti e que desista un huerti atihu entri política i luenga i, craro, sina reconocéncia pol parti lo primeru nu desisti lo segunderu. Asín mos va, que ca vezi muerin mas luengas polque pol parti los gobielnus nu quirin u nu les convieni defendel u apuchal tala u cuala luenga.

Peru amigus, llamalmi chirulatu u arrepiau pol hazel lo que hagu, que es arrecuperal una luenga sin hechal manu los políticus. La mi parti es la filulohia, la lingüística, nu los nacionalismus ni la estitucionis políticas. Hagu lo que hagu polque m’avehina que tengamus una luenga i naidi la reconoça i m’avehina que en tuviendu el estremeñu duranti sigrus, a naidi acetu a dos bollaus de la hirola les aiga vagau (ni que izil tini hurgau una mihina la golienda i el enterés) d’escrebil una nolmativa, de hazel una gramática. Tolos que tocan el estremeñu son dialeutulogus nuevus que ven la muestra palra cola emoción dun arqueulogu ena hallaura dun cachinu e vasiha, i. e., dendi un longol própiu dun meicu con el su pacienti. Cuántus cumu falantis nativus án tiniu riañus pa izil: «Chacho, hagamus gramática»? Los dos bollaus denantis i el que vos palra namás. Án tiniu que vinil henti foriata a izilmus cúmu palramus en Estremaura i lo que es piol, a concluil que estu es castellanu. I muhotrus cumu bobusus mos lo creyemus i, craro, asina mos va, que le izis al de la estallesa «Güenas tardis!» i pahi que le hueras llamau de nombri!!!

I craro, la pega que abemus es que nu quei el estremeñu nolmativizau lingüisticaenti, que esu drentu lo efariciosu es cosa cencilla, sinu que quei estitucionalizau i con reconocéncia política. Amigo, velaquí que mos atopamus el gran tarugu que mos á empiiu ahilal palantri! Al gobielnu enhamás le á precupau estas cosas. Angañu tinin almientau a «a fala» cumu bien d’enterés curtural, cumu si huera la torta el Casal u el Harrampra. De verdá puein consieral una luenga cumu bien d’enterés curtural? Una luenga es una curtura pol sí mesma!!! Peru, chacho, óndi anda el purtugués rayanu? Óndi demontri almientan ná el estremeñu? Tantu guarreu foriatu que mos hundi en atollaerus de vergoña mos á hechu acachal la cabeça cumu si estuviamus embahu el ñugu i mos hurgan cola aihá i sin gañil ni mihita ahilamus pa pondi igan. Pos mirai, amigus el foru, que yo há angunus añus que me quité esi ñugu que m’estorbaba vel bien i vel palantri i agora lo que llevu encima mia nu es el pesu el guarreu dahuera, sinu el pesu d’enfrontilalmi solu a una luenga que la tenemus a la cutaina arrebuhá en espartu con cascárrias pol tós laus. Pol esu vos igu que nu andís espurgandu nel pratu ni hagais barru con peliherias i que lo primeru es lo primeru: hundeal con el ñugu esi, endereçal el testús i esmiençal a tomal concéncia. Aluspués vendrán los papeleus burucráticus, peru lo primeru es lo primeru. Enga un saluinu i asperu nu belvus aburriu en demasia.