el embargo

SEÑOL jues, pasi usté más alanti
y que entrin tos esus
No le de a usté ansia
no le dé a usté mieu…
Si venis antiayel a afligila
sos tumbu a la puerta, ?Pero ya s?ha muerto!
Embargal, embargal los avius
que aquí no hay dinero:
lo he gastao en comías pa ella
y en boticas que no le sirvieron;
y eso que me quea,
porque no me dio tiempo a vendello
ya me está sobrando
ya me está jediendo.
Embargal esi sachu de picu
y esas jocis clavas en el techu
y esa segureja
y esi cachu de liendru…
?Jerramientas, que no quei una!
¸Ya pa que las quieru?
Si tuvia que ganalu pa ella,
?cualisquiá me quitaba a mí esu!
Pero ya no quisu vel esi sachu,
ni esas jocis clavas en el techu
ni esa segureja
ni esi cachu de liendru…

?Pero a vel, señol jues: cuidaítu
si algunu de esus
es osao de tocali a esa cama
ondi ella s?ha muertu:
la camita ondi yo la he queriu
cuandu dambus estábamus güenus;
la camita ondi yo la he cuidau,
la camita ondi estuvu su cuerpu
cuatro mesis vivu
y una nochi muertu!…
Señol jues: que nenguno sea osao
de tocali a esa cama ni un pelo,
porque aquí lo jincu
delanti de usté mesmo
Lleváisoslo tou
tou, menus eso,
que esas mantas tienin
suol de su cuerpo…
?y me güelin, me güelin a ella
ca ves que las güelu!…

Gabriel y Galan