Inicio » Generales » La Laguna

RECETA NAVIDEÑA

Garrovillas de Alconétar Foros Generales La Laguna RECETA NAVIDEÑA

Viendo 8 publicaciones - del 1 al 8 (de un total de 8)
  • Autor
    Publicaciones
  • #1020
    CAT
    Miembro

    A vel si anguien puei dalmi la receta de «PATU DE LAS ALBUJERAS A LA NARANJA» que la quieru jacel pa nochi buena.

    #102682
    CAT
    Miembro

    Perry, pasami esti mensaji al foru de la Laguna, porfavol.

    #102683
    saavedra
    Jefe de claves

    Lo primeritu de tou es cogel el patu y pa esu lo mejol es una escopeta pajarera y jadel_li un refini en la chinostra, peru que quei entera y se muera de un dau, dehpue le retuelcih el gambeti y lo metih en una palangana con agua de la Juntanina bien calentita pa quital_li el plumaji.
    Lo abris por la meta y le quitah las tripas y las asauras pa escaldal_las en un pucherinu; cuandu esteh bien escamondah lah vuelvis a metel en el patu.
    Lo embadulnas de chicharronih de cochinu y le pinchas un palu desde el culu a la chinostra, o sea la cabeza.
    Jadih una buena minaria de encina y cuando tengas un buen borraju lo ponih encima y le dah vuelta hasta que quei bien embueciu echanduli cai cuandu una poquina de sal y un traginu de vinu pa ti pa calental el cuelpu.
    Cuandu ya estei bien dorau lo ponih en un lalgeru y le añais una hojinas de hartolana, te vah pa loh cantus de lah albujera con un buen platu de chanfaina y otru de friti y una botellina de vinu.
    Pol ultimu el patu lo vuelvih a lah albujera y tu te comis la chanfaina, el friti y te bebis en vinu.
    Comu me se olviaba te comis una naranjina de postri y queah comun señol.
    Llevati una buena pelliza pol que ja un friu de cojonih.
    salu

    #102684
    CAT
    Miembro

    Compairi Saavedra me ha petau la tu receta y he jechu tal como tu has dichu y aqui te cuentu lo aconteciu:
    Esta nochi pasá, avié loh bártuluh me jinqué unus buenus bochinchis de aguardienti pa soportal mejol el friu y a lo chitu queu cogí el tolih tolih pa las albujeras procurandu no topalmi con naide en el caminu.
    Como muchu era el friu, muchu fue el aguardienti que desfiló pol el gañoti, asina que a mediu caminu comencé a jacel zingoñetah calleja abaju. Caía una garrua que calaba los güesus.
    Cegañutu que iba y endispueh de unus pocus jocicazuh, cohtillazuh y culatazuh, sin dalmi cuenta me meti en la paparretah de lah albujera queandomi atollau sin poel echal ni p’alantri ni p’atrah. Dende allí mesmu saqué la ehcopeta pajarera y apunté a loh patus. No sabía a cual afeitalmi. Uno se me acelcó diciendo CUA;CUA;CUA y yo pensé pa mi qua, qua … pos tu mesmu. Era cimbiliqui y desgalamiu, peru lo bastanti pa una buena botifora. Asina fue que con la tiritona que tenía de lo arreciu que estaba no llegué a atinarli y namás le jici un rehpalijoninu de na y lejus de jincal la crehta el bichu se lah guilló.
    Endihpuéh de la aventura tube que ilmi dejechamenti pa casa con el rabu entre las pielnas y arreciito de friu y asina me tienis antobía, metiu en la cama con una buena calentura que hasta los peus tengu agañotaus.
    No estés enfurruñau conmigo endihpueh de aberti molestau en dalmi la receta, amigo, que he queau ehcaldau y valienti desazón tengo yo en el cuelpu.
    Te deseo que pasis unas muy felicis Navidadis.
    Oyi, ¿no sabrás la receta de la sopina de tomati?

    #102685
    saavedra
    Jefe de claves

    Paisanu Cat lo que más sientu eh habelti metiu en esa bejigera, peru ya sabis que «quien quiera pecis que se moji el culu» , aunque creu que tu tah mojau hasta la meonina, peru hay vecih que se mereci el boyu pol el coscorrón, ¿y si llegah a cogel el patu qué?.
    Como yo estudie en ca Tiu Borregón y en la escuela de la señora Petra, allí en las clasis estraescolais de veranu nos daban gastronomía y tengu paquí la receta de la sopinah de tomati.
    Empiezu: Lo primeru de tou es juntal la jerramienta y los productuh y pa esu tienes que tenel un buena salten con estroucis, una buena cuchara jerreña y una buena navajina.
    Primeru tienis que jadel un buen cerrabullu con tomati, que no sea de cagali, una buena cebolla bien desmonga y algún pimientinu y lo metis tou en la salten con una buena amaña de aceiti de la pueblu y de cai cuandu le pegas con la jerreña pa deborrizal_lu tou lo que pueah.
    Mientra en un lalgueru con la navajina jadih una rebanainah de algún berucu de pan que tenga en el moral, el reguju tien que estal mas duru que un gorrón, y no te queih cortu que estu tien pocu alimentu y dejas el lalgeru bien acojolmau.
    Cuandu el cerrabullu de la salten este bien frititu lo embruecas en el pan y espera que se lo embeba, si te quea sequinu le añaih algu mas hasta que quei comu una paparrucha, y con estu estan jecha las sopinah de tomati; como creu que con tu estau y con las calenturas que dicis que tienes me paji pocu creu que te tendríah que jadelti una polea de postri polque creu que eris un poquinu churupu.
    Pero esa receta te la jagu llegal otru dia.
    ejeuuuu.

    #102686
    Reguju
    Miembro

    …joé Savedra, manejas de cojonis las estrauci y los pucherus…

    No sé si atrevelmi con la receta…peru no sé que he jechu, si me destapau esta nochi o me fuí con Cat a por el patu a las albujeras…..peru tamién me cojiu un costipau comu una oveja mocosa…..he perdíu el gustu, el olfatu, tengu unas lagañas comu el caballu un picaó, se me cai la moca, las naricis toas despellejá de sonalmi el agüilla con las servilletas de los baris que son mu tiesas…..si me jumu un cigarru, paji que me liau unas hojinas de la jigera de mi madri…….y lo peó, es que me voy pol el terciu de vara que dá gustu…un desastri….y esus tomatis que has empleau, si son de cuelga, creu que no masientan….y las poleá, mejó tesperas unus dias. ¿Que quieris? ¿Quitalnus el pelleju….?

    A vé si nos recuperamus pa estus dias ¿nu?

    Polque los jarabis y esas pamplinas, despué de cojíu el trancazu, a mi no me jadin naita…me comitu.

    Y la parienta dí que el guisqui tampocu tién que sel mu buenu….peru a mi me paji que me dá mejó resultau..

    …miravé, tú quentiendis…algu caseru…polque estu es un sinvivil.. Menus mal, que solu cazu unu al añu…

    ..Ya nos veremus. Arroparus bién con la de orillu…

    #102687
    saavedra
    Jefe de claves

    Vamuh a vel Reguju, lah sopinah de tomati vienin mu bien pal costipau peru tienin que il acompañah de unuh torrehninuh y un cachinu de patatera polque sino la pasmaruta no te sal y encima te quean las patinas rejilanderah.
    De toah manera te voy a dal algunuh remediuh caseru que aprendí en ca Doña Julia la de correu en las clasih de cultura popular.
    Pal catarru se puein jadel variah cosas, por ejemplu cogel unas bellotinah de los nogalitus que’stan pal tallel del Tiu Daniel y cocel_la en un poquinu de agua y tomal los vaporih tapau con una toalla.
    También pueh cogel una bellota de encina de pa la jesa grandi, le jadih una rajina con una navajina y te metih en la boca, despueh metih la cabeza en el jornu de la cocina y lo ponih a 200 graduh centigradu, cuandu te estalli la bellota sacah la cabeza y seta quitau el costipau; estu mesmu lo pueih jacel en el micrujonda, peru salih con la chinostra un poquinu enbuecia.
    Otra solución es echal en una petaca, si puei sel de cueru mejol, un poquinu de agua y tabacu de charrasca o de boti y te la ponih en la cabeza, en dispueh te sientas en el fuegu grandi de la cocina de butanu y cuandu empieci a jervi el tabacu te levantas y estas mejol, no aguantih muchu que te puei salil almorranah, con esti remediu se te quita el atrancu de lah naricih.
    Un conseju pa evital lo jostigau de las naricih por la selvilletah es que tu mujel te jaga un chalecu de lana con magah lalgah y en ve de limpiarti en loh papelih de los barih te pasah la tocha por la manga, acuerdati que de chicu algunuh tenian lah mangah con mah brillu que un coronel.
    Si veis que estu no te da buen resultau, te restriegas vivaporuh en el pechu y una pastillina de acidoacetilsalicilico, o sea okal con lechi bien calienti y a la cama, estu se puei acompañal con sudorih de pechu ajenu.
    salu

    #102688
    Reguju
    Miembro

    ….estrechas las he pasau, Saavedra…Peru creu que de esti salgu. El agüilla sa convertíu en unus mocus verdis y con fundamentu…peru me los suenu bién sonau y me quea la tocha bién despejá…Y toitu, veleí, pol que me llevé pa Garroti la tu receta, y un poquinu daquí y otru poquinu dallí, creu que pa nochivieja, po lo menu, llegu.

    Comu la he seguíu al pié de la letra, algunus dañus colateralis man queau, peru naita gravi.

    A vé si te veu y te lo cuentu personamenti. Quea con dios.

Viendo 8 publicaciones - del 1 al 8 (de un total de 8)
  • Debes estar registrado para responder a este debate.