Eras’un pairi (padre) y una mairi (madre) que tenían un hiju mu chiquininu, mu chiniquinu, comu que había nacíu diun granu de trigu. Un día la mairi lo mandó a llebal la comí’a su pairi que ehtaba arrand’en el Rollu.

Jué Benininu y le dis al pairi: 

— Pairi, béngas’uhte a comel, mientrah yo araré con la yunta.

Bin’el pairi y Benininu se queó arando.

Pasan pol allí unos pañeruh finuh con unah calgah de pañu, y unu le dis al otru: 

— Mir’aquella yunta arandu sola (com’era tan chiquininu no lo beían).

Y el pairi de Benininu que loh oyó le dijo: 

— No, no ehtá sola, que ehtá acompañá.

— Poh ehtá sola.

— Poh ehtá acompañá.

— La calga de pañu a que ehtá sola.

— La calga de pañu a que ehtá acompañá.

Ba altoncih y dis el pairi: 

–Benitinu canta hiju, canta.

— Don, don Benininu bieni

–Don, don Benininu ba

–Don, don Benininu bieni

–La calga de pañu ganá, y ganó la calga.

Otru día se ba Benininu a la güelta y ehtaba el pair’arandu y emprecipió a llobel. El pairi se ju’a (fué a) la casa y Benininu se metió dembaju d’una hoja de belza, y el burru qu’ehtaba suertu se comió la berza. Acabó de llobel y el pairi le llama:

 –Benininu.

— Qué, pairi

— Aond’eh donchitu y le meé drentrutáh.

— En lah tripah del burru.

El pairi mat’al burru y le’ sacó lah tripas y lah ech’encima de una peña pa que se se-caran y sacál de allí a Benitinu; cuando pasa pol all’una dorra (zorra) y se comió lah tripah y salió corriendu, y Benitinu le dis a la dorra: 

— Corri corri, que cuanti mah corrah peol pa ti.

Se cantea la dorra y no bey a naidi, y buelb’otra beh Benininu: 

— Corri, corri, que cuanti mah corrah peol pa ti.

Y a la telcera beh dis la dorra: 

–Poh ehto tien que sel en la mi barriga, boy a tiralmi, de aquella peña arta, a bel lo que teng’en ¡ah mih tripah.

Se tiró y se mató.

Al pocu tiempu pasó pol allí un pahtol y apenah lo barrunta Benitinu le dih: 

— Pahtol , sácami d’aquí.

— Poh aond’ehtah ?

— En lah tripah de ehta dorra .

El pahtol lo sacó de lah tripah, y entoncih le dis Benininu: 

— Jahm’un (hazme un) tamborinu de lah tripah de la dorra pa que me baya a gañal la bía piyendu (pidiendo), pol que la mi casa ehtá mu lejuh, y el pahtol le jidu (hizo) el tamborinu.

Benininu se jué pol esuh mundud piyendu con el tamborinu, cuando se le jidu de nochi, y bió una luh mu lejuh, se acelcó Benininu a la casa y bió qu’era una casa de laironih (ladrones), y emprecipió a tocal el tamborinu y a cantal: 

— Don, don Benininu bien

–Don, don Benininu ba

–Don, don Benininu bien

–Dalm’un cachininu de pan.

Salih loh laironih y no encuentran a naidi, polque s’ehcondió detrah d’una piera (piedra). A la telcera beh encuentran a Benininu.

–Poh que jadih aquí?

— Piyendu un cach’e pan.

Lo metierun en’un cualtu ehcuru aondi tenían el dineru, y Benininu se enllenó loh bolsilluh y el tamborinu d’oru. y com’era tan chiquininu se ehcapó pol debajo de la puelt a, y se jué a casa, y jidu ric’a suh padrih.

Y sanseacabó el cuentu, y mi casamientu- Jid’un (hice un) joyitu, y le mée drentru.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

0 comentarios

Deja un comentario