Vesita a Garrovillas pa palral en estremeñu

Salús amigus de Garrovilla! Muchu has que no entru nel foru el vuestru puebru, angunus m’abrán orviau i otrus simprimenti ni sabrán quién soi. Antañu me acupaba de resorvelvus las duinas que tiniais al tentu las parabras el vuestru puebru (dándi vinian, el su senificau i paí) u custionis al tentu el estremeñu. Balbanchu ayuó i comentó paí abondu. 

Namás vos avisu pa si me veis pal vuestru puebru angún diina destus. Un amigu de Miajás, quien lleva la associación Pablo Gonzálvez al tentu el estremeñu, i el que vos escrebi andamus en paragi de dil pa Garrovillas a palral conos vuestrus vizinus assín mayoris i que mijol sepan palral el estremeñu dallí i assín de passu vel el puebrinu. El propósitu es hazel tamién angunas grabacionis pa dal testimoñus a los inorantis que din qu’en Estremaura namás se palra castellanu: queremus demuestral qu’assina no es u al menus precural arrecogel lo que puamus pa dali opuli al estremeñu, no con librus namás u cona Güiquipeya, sino tamién con soniu. 

A lo plontu, namás imus a palral con un matrimoñu el vuestru puebru, pero si angunu mas está enteressau u si sabís dalguin que puea estalu i no l’emporti palral con musotrus en estremeñu (essu sí, musotrus tamién bicharemus, craro!), hazei el favol de izílmilu pol aquí mesmu. Agraeçu la vuestra ayua.

A tó estu, asperu siguil resorviendu las vuestras duas al tentu las parabras u lo que querais el estremeñu, que pa essu andamus!