El rey y el vaqueru

Un rey jué de caza y pelsiguiend'un cielbu se meti'en un monti y se peldió. Ya de nochi bió una luh y se acelcó y allí bió a un baqueru que le preguntó:

--Poh qué te pasa?

--Que me peldíu

--Poh éntrati. en la mi choza y siéntati bien, que con el pan de centenu y la lechi bacuna, tiraremus treh peuh pa la foltuna».¡Pon!, pal rey, que estará mu tranquilitu en su palaciu.

¿Quieris pan y quesu?

--Buenu

--Po cógilu, «que con el pan de centenu y la lechi bacuna tiraremus treh peuh pa la foltuna». Pon pal rey, que comerá en su palaciu mú tranquilu cosa mu buenah.

Sacó después el baqueru su petaca llena de charrahca y se diju:

--¿Quierih jumál ?

--Buenu.

--Poh coj'un cigarru, «que con el pan de centenu y la lechi bacuna tiraremus treh peuh pa la foltuna». Pon pal rey, que jumará buenuh puruh.

Telminarun de jumál y el baqueru le dis:

--¿Quierih acohtalti?

--Buenu.

--Poh coji la manta que tú quierah y tiénditi, «que con el pan de centenu y la lechi bacuna, tiraremuh treh peuh pala foltuna». Pon, pal rey, que dolmirá en buenah mantah y mejól cama.

A la mañana siguienti se lebantó el baqueru y le dis:

--Qué, ¿hah dolmíu bien?

--Sí.

--¿Qué te jah (hace) farta ahora?

--Que me enseñih el caminu, le dijo el rey.

--Buenu, puh ahora, otru cigarru, «que con el pan de centenu y la lechi bacuna, tiraremuh treh peuh pala foltuna» Pon, pal rey, que tendrá buenuh caballuh pa caminal, y no comu musotruh, que le tenemuh que jadel (hacer) a pie.

Se jué el rey y encontró a la su genti, y, cuandu llegó al palaciu, le diju a un criau:

--Baya tal sitiu, y allí bibi un baqueru en una choza, y le idis (dices) que se benga contigu, y si no te quiel (quiere) creel, le enseñah ehti bahtón de oru del mi mandu.

Jidu (hizo) su mandatu el criau del rey, y al llegal a la choza y contalli al baqueru lo del rey, teme- rosu, no quería il; poru al fin jué, y al llegal a Palaciu bió al rey paseandusi pol el jaldín, y se arrojó a él, agarrándulu pol el pehcuezo y le dih:

--Lairón (ladrón), tú le dijihtih al rey lo de loh peuh, poh comu me pasi algu te matu comu a un cochinu.

El rey no se dió a conocel, y se jué al palaciu, vihtiéndusi de traji real. y lo mandó llamal. El baqueru lo conoció y arrodillándusi le piyó peldón, diciénluli que había siu sin malicia. El rey lo peldonó, le empleó como un criau, y allí bibió mu bien siempri.