#104124
Fraili
Participante

Ás iziu bien, Balbanchu. Es un prohesu regulal los dialeutus que tardi u templanu si quirin sobrivivil esmiencin una etapa e nolmativización. Asina pasó con el vascu que sin acabihal con el hazi dialeutus crió el euskera batua qu'es el que deprendin los zagalinus enas escuelas i es el que sal palrandu pola teli i el arrádiu. Esu hue lo mesmu qu'aconteció con el hónicu-áticu ena Grécia antígua, que tomandu el dialeutu el Ática holmó una luenga común pa tola Éladi eno que se llamó coiné elenística. Esautaenti lo mesmu está pasandu agora con el asturianu: pol mé la varianti ociental s'á escrebiu una nolma i se está piyendu la oficialiá.

Pal estremeñu, qué varianti sedria la comenienti apuchal? Está craru que sedria el artustremeñu, pol sel la varianti dialeutal con mas rahus astulionesis, en otru sintiu, la menus castellanizá. Veleile que tenís el vuestru puebru, Serrailla, tola comarca Las Hurdis ondi punas concausas u pol otras el estremeñu s'á conselvó duranti sigrus cuasi intautu. Arrancandu daí es dondi ebemus basalmus pa hazel esa coiné estremeña que mos sirviria cumu el própiu nombri aseñala (koinós=común) pal común los estremeñus.

Tolas variantis estremeñas están a piqui e moril cumu nu mos sostribemus nuna varianti común. Daquí a 50 añus namás mos quearán cuatru parabrinas i una prenunciación emaseá meriyonalizá cumu nu acachemus las costillas i mos enliamus a labutal puna nolma pal estremeñu. Asinque, señoris i señoras, mos aspera un gran huturu si tós trebahamus! Ánimo!