Güenas!

Güenas!

Enantis de na, me petaria presentalmi: me llamu Hosi Luis i soi emeritensi, inque agora mesmu andu estuyandu Caminus en Burgus… en fin, asperu gorvel plontu pa Estremaura. Soi la presona que creó EstremaWeb nel su dia, i güenu, amigu el Fraili… sí, me consieru amigu el fraili, inque ni le conozu en presona, ni gastu la su ortugrafia pol sel el mi amigu: la gastu polque creu que realmenti es un ententu sériu d’uñificación el estremeñu.

Güenu, a lo que diba, llevu un tiempu viendu esta caraba, me paci enteresanti el tema tratau, inque pol unas cosas i otras (especialmenti pol nu sel garrovillanu), nu é chegau a rustrilmi hata agora… peru tras leyel el mensahi escribiu pol CAT, creu qu’es convenienti dal la mi opinión:

En prencipiu se palra al tentu qu’eberia desistil un olganismu oficial que protehiesi i nolmativiçara el estremeñu, en fin, estoi totalmenti dalcuerdu tegu, peru la rialiá es que ni desisti, ni paci que vaiga a desistil prosimamenti (aholá desistiera…). I altonci, cumu preguntaba CAT, quién mos izi qué gramática es la güena? La respuesta es tan simpri cumu naidi, i es nesti momentu nel que yo me preguntu, ebemus quealmus paraus, asperandu, mentris el estremeñu espena pocu a pocu? I cúmu escrebimus n’estremeñu hata altonci? Nu escribimus n’estremeñu pol mieu a marral?… Creu qu’está craru qu’es mestel hazel argu ya, i ena mi opinión, sin un estremeñu uñificau nu vamus a denguna parti (creu que nu soi solu yo el que piensa estu). Iziu estu, la siguienti custión es, pol qué gastal la ortugrafia el Fraili? La respuesta a esta pregunta es argu suhetiva, peru güenu, la mi razón prencipal es la siguienti: yo nu tengu mucha conocéncia en materia luengüística (argu qu’el Ismael sí tieni), peru veu que la ortugrafia creá pol esti ombri nu á siu hecha polque sí, se vé que s’á labutau abondu nella, espricandu las razonis… i estandu abierta a huturus chambus. Estu, cumu é iziu enantis, es una opinión mia, ai una tupa henti que nu gasta esta ortugrafia peru sí escribin n’estremeñu, esu es custión de ca unu, peru ai que tenel craru que ogañu, el estremeñu tieni en contra al tiempu, asínque nu mos puemus queal paraus.

Pol úrtimu (i perdón pol hazel esti pazu testu), izis que te petaria qu’esti proyeutu saliera p’alantri, güenu, esu nu es cosa mia, yo é puestu una simienti, i hazré lo posibri pa que tantu esti proyeutu, cumu la Güiquipeya i otrus proyeutus desti tipu tirin p’alantri, peru es mestel henti que colabuti, henti que mos lea, henti que mos empunti ánimus… en fin, asperu qu’esti mensahi vus haga cavilal un poquinu, i güenu, envial un salú a tolos forerus.