La vesita a Garrovillas

Essi vídiu no es Garrovillas, no. Es Serrailla celebrandu el dia el estremeñu serraillanu. Idea no maleja que vusotrus tamién podís hazel, endispués de comprebal la güena salú que tien el estremeñu allí en Garrovillas. 

Amigos garrovillanos, un saluinu dende Caçris. Lo primeru, dalvus las grácias pol acogelmus nel vuestru puebru el passau dia 4 con essa bonura que caraiteriza a los puebrus estremeñus, á siu lo mas mijol que mos llevamus dél. Á siu un güen primel passu pa huturas vesitas i paque sepais que dessisti muchia mas genti enteressá nel estremeñu garrovillanu, que no seis los únicus. El amigu Bienviniu tomó ideas pa la su associación en Miajás i hizu güena gavilla conos vuestrus vizinus; Chema (tiu Canchu) se queó almirau en oyénduvus hablal i hizu güenus vídius que asperemus plontinu eiti i suba a la Redi; serviol á confilmau muchas cosinas tocantis al estremeñu que allí gastais i que no quijiera ponel paquí pol no aburrilvus con enreus filológicus, ya los idré pusiendu ena mi bitácora , sigún puea subil angunas grabacionis.

Angunas osselváncias:

En supiendu comu sabís hablal tan bien el estremeñu es incomprensibri que no hagais mas cosas pa conselvalu. No estais solus, ain paí mucha genti enteressá en el estremeñu i que inora comu se palra allí i le gustaria sintilu i deprendelu. Comu amanti desta luenga podís cuental con migu pa lo que querais que, eno que puea, ayuaré. Estoi a escrebil una GRAMÁTICA de la que tós puamus guialmus nel usu el estremeñu, tengu hecha una ortografia, la quala estó revisteandu pa hazel la segunda eición, i andi mas andu trebajandu es nun dicionáriu (ogañu llevu unas 8000 parabras i es un no acabal) con tó lo nesseçáriu pa queal bien decumentá las muestras parabras. I comu yo ai muchus paí que ena miia las sus possibiliais curtivan el estremeñu, hiziendu páginas web, associacionis, dicionárius, puesias, relatus… Tó es custión de dilmus conociendu a pocu a pocu i demuestral a la genti que el estremeñu no es enventu dengunu, que se habla (ca dia menus sin dua pola muestra curpa) i de dil pegánduli vencijonis paque se conoça i se platiqui.

Mas cosinas: a Wifredo le estuvi ijiendu que siempri que tengais la possibiliá, subais a la Redi carabas en garrovillanu, en vídiu u en cinta, si es en vídiu mijol, la ponís nel Youtube i que callin las sus boconas las dozenas dialeutologuchus  que din qu’el estremeñu es una corruición el castellanu. Amás, con ellu, la genti se va tomandu cuenta de la verdaera dessisténcia el estremeñu.

Veloí, los serraillanus hizun el añu passau el dia la habla serraillana i subierun vídiu al Youtube, aquina vos lo é puestu que lo veais tós.

Estu es lo que tenís que hazel vusotrus tamién, que se sienta, no namás pal vuestru puebru, sino pa la redi! Que el dia 1 Mayu no se quei en ná, que retumbi i seya sonau!

Otra cosa. Vos recuerdu que dessisti una Wikipedia en estremeñu, la Güiquipeya,  que entri tolos qu’andamus ya á arcançau los 674 endirguis. Lu qué andais hiziendu que no escrebís vusotrus tamién nella???? No es mu esbariciosu, assinque animaivus! Podís escrebil el artículu sobri el vuestru puebru, los vuestrus menumentus, las vuestras costumbris u no tien pol qué sel de cosinas estremeñas namás, podís escrebil del tema que sepais, essu sí, siempri gastandu el estremeñu. Vos conviu a que jecheis una guipaina i veais los endirguis qu’ain ya puestus.

Ya pa arrematal, que alogu vos cansais de leyelmi i no me hazís casu , pa qualisquiel cosina que querais al tentu el estremeñu comu sabel dóndi vien una parabra, cómu se eberia escrebil i pol qué u mesmitamenti, cómu crial un artículu ena Güiquipeya, podís palralmi dende aquina mesmu, dende Alkonetera, u dende la mi bitácora Cuyu pan esgarras? u dende la caraba la página la própia Güiquipeya que es velaquí esta. Assinque ya sabís, no seyais tan haraganis ni vos avejineis tantu polo que tenís, polque á llegau l’ora de que el mundu conoça que el estremeñu dessisti, que acontina vivu en Garrovillas i que entavia le quean muchus tirus pol pegal! Un saluinu!